Dakigunez, irailean Balmasedako kiroldegi berrirako proiektuen lehiaketa antolatu zuen Udalak. Guztira 24 proiektu aurkeztu eta denak ikusgai egon ziren Kultur Etxean. Urtarrilaren 18an epaimahaiak hurrengo hauek saritu zituen:
Ideia-lehiaketaren irabazlea:
“Argi eta Garbi” proiektua. Leloak dioen bezalaxe, proiektu argi eta garbia da; estetika aldetik agian ez da politena (subjektiboa da hori), baina erabilgarriena izateagatik hautatu dute, eta, baita ere, teknika zein ekonomiaren ikuspegitik, benetan gauzatzeko moduko proiektua izateagatik.
Jendaurreko erakusketan aurkeztu ziren ideia eta ekarpenen ondorioz, lehenengo bilera egin da proiektu irabazlea hobetu ahal duten proposamenak egiteko; horrela, aldaketak eginda, martxorako oinarrizko proiektua amaituta izango dugu zuei berriro aurkezteko.
Lehenengo saria hauxe da: kiroldegia burutzeko proiektuaren esleipena eta obraren zuzendaritza, 232.000 euro ingurukoa.
Bigarren saria, 3.600 eurokoa, “Lorea” proiektuak irabazi du. Estetikari dagokionez, proiekturik onena zen eta originalena ere bai; dena den, zailtasun tekniko eta ekonomiko ugari zituen burutzeko, eta, gainera, ez zen funtzionala: igerilekuen eta eraikin berriaren arteko loturarik ez, aldagela gutxi, kiroldegiko pista estaliak baina irekiak…
Hirugarren saria, 2.400 eurokoa, “Kadaguak” proiektuarentzat izan da, asmo handiko ideia polita zen baina proiektu honek ere arazoak zituen, esaterako, ibaiaren gutxieneko atzerapen-lerroa gainditzen zuen, eraikin berrien altueraren antzekoa zen eta igerilekuen eraikinaren eta kiroldegiaren arteko loturarako proposamena ez zen egokia.
1.000 euroko lau akzesitak hurrengo hauentzat izan dira:
-“ B Plan”. Gainerako 23 proiektuetatik urrun dago, oso bestelako ideia da; izan ere, kiroldegi berria gaur egungo igerilekuen gaineko eraikin batean egitea proposatzen du. Erabilera aldetik interesgarria bada ere, arazo tekniko bi ditu: eraikinak behe solairua eta beste hiru solairu izango lituzke, eta igerilekuak gutxi gorabehera bi urtez itxita egon beharko lirateke.
-“Zubiberri”.
-“U”.
-“Ez zurekin, ezta zu gabe ere”. |
