Pasio biziduna

OSTEGUN SANTUA

Ostegun Santu gaueko 21,30ean hasita, San Severino plazan da lehen ekitaldia. Euskadiko Monumentu Nazional den Elizaren ataurrea erabiltzen dute Apaizen kontzilioa eta beroien aurreko Jesusen epaiketa antzezteko eta udaletxeko arkupeak Azken afarirako.

Antzezpena Jerusalen herriaren sorrerarekin hasten da. Horrela, pertsonaiak sartuz doaz eta plaza zuziek emandako argi naturalez argituz doa. Giro egokiena sortzen da horrela, antzeztuko diren gertaeren   sentsazioez jabetzeko.

Ordu bete inguru irauten du pieza hauen antzezpenak: Apaizen Kontzilioa, Azken Afaria, Olibondoen Baratzeko Otoitza, Jesusen Atxiloketa eta Caifásek gidatutako apaizen aurreko epaiketa.

Caifásen ebazpen-hitzekin: “ahora serás conducido ante el gobernador romano Poncio Pilatos para que decida tu suerte” amaitzen da ostegun gaueko antzezpena, hurrengo goizean jarraituko dena.

OSTIRAL SANTUA

Balmasedako Pasioak duen atalik ezagunena eta dramatikoena da eta 9,30ean hasten da Mojazelai deitutakoan, Clarisen komentu zaharra han baitago.
Hiru alde oso ezberdindu ditu:       

        Pilatoren epaiketa

Judas urkatzen duten unean hasten da, eta jarraian Pretorioan Pontzio Pilatok egindako Jesusen epaiketa, Jesusen zigorra, Barrabasen askapena eta Ecce Homo izenekoa antzezten dira. Antzezpenean apaizek eta Pilatorengan Jesus zigortzeko eragin nahi izango duen jendetzak hartzen dute parte.

Behin zigortua, 65 kilo inguruko pisua duen gurutzearen zama jartzen zaio eta Jesusek Gurutze-bideari ekingo dio Dimas eta Gestas lapurrek lagunduta. Jarraian lehen erorialdia eta María Magdalenarekin zein Ama Birjinarekin izandako topaketak etorriko dira.

Ekitaldi honetan guztian, Kolitza abesbatzak Pasioaren inguruko Balmasedako abesti zaharrak abesten ditu.     

        Gurutze-bidea

Balmasedako gune historikoko kaleetan zehar egiten da, gurutziltzatzea antzezten den tokiraino.

Ibilbide horretan zehar, Foruen plazan eta San Severino plazan izango dira bigarren eta hirugarren erorialdiak, hurrenez hurren.

Gurutze-bidean beste ekitaldi batzuk ere antzezten dira, besteak beste: Jesusi gurutzearekin lagundu zion Cirineo harrapatzea, Veronicarekin topo egitea, eta, ondoren, bigarren erorialdiaren ostean, Jerusaleneko emakume errukiorrekin topo egitea.

Jesus hirugarren aldiz erori ondoren, Gurutze-bideak Martin mendia kalean egiten du gora, Zubi Zaharrera iritsi arte. Zubi Zaharra Balmasedako beste monumentu nazional bat da eta Erdi Aroko harresiaren garai bateko atea. Handik azken eszenatokira abiatzen dira eta gurutziltzatzea antzezten dute bertan.

Ekitaldi horretan penitenteak agertzen dira gurutzea daramatela Gurutze-bidearen aurreko aldean. Gutxi gorabehera berrogeita hamar penitente izaten dira eta zama handiko gurutzeak daramatzate horietako batzuek. Pertsonaia horiei esker mantendu du Gurutze-bideak tradizioak egotzi izan dion damu izaera.

        Gurutziltzatzea

50 metro zabal eta 15metro altu den eszenatokian egiten dute Kristoren Kalbarioaren azken egonaldiak.

Ikusgarritasun eta dramatismo handiko ekitaldia da. Jesusek bere azken hitzak esaten ditu, azken arnasa ematen du eta gurutzetik jaitsi eta hilobira eramaten dute. Orduan amaitzen da antzezpena.

Eszenatoki horretan bertan Kristoren heriotzarekin lotutako garai bateko erlijio-kantuak abesten ditu Kolitza abesbatzak.

Pausuen Prozesioak

Pasio Biziduna ez da Balmasedako herritarrek Aste Santuan bizirik mantentzen duten ohitura bakarra. Pauso artistikoak dituzten hainbat prozesiok ere hiribilduaren errukia islatzen dute Ostegun eta Ostiral Santuan.

OSTEGUN SANTUKO PROZESIOA

Ostegun Santuko arratsaldeko 19:00etan egiten da. San Severino plazatik irteten da Hedegile eta Martin Mendia kaleetarantz, horren ostean San Severino plazara itzuliko da.
Pausoekin batera erromatarrak eta penitenteak (burua estalita, oinutsik eta gurutzea hartuta) joaten dira.
Horiez gain, Kolitza abesbatzak eta Azkoaga musika bandak ere hartzen dute parte prozesioan.

LURPERATZEAREN PROZESIOA

Ostiral Santuko arratsaldeko 19:00etan hasten da. Aurreko eguneko pertsonaiekin eta pausoekin batera, Magdalena, Ama Birjina, Veronica, apostoluak eta goizeko antzezpeneko beste pertsonaia batzuk joaten dira desfilean.

Pausoen kalitateak eta pertsonaien egoera ilunak izugarrizko tristezia eta baitaratze giroa ematen diote prozesioari.

Ibilbidea San Severino plazan hasten da, Hedegile eta Martin Mendia kaleak zeharkatzen ditu eta San Severino plazara itzultzen da.

ISILTASUNAREN PROZESIOA

Ostiral Santuko 21:30ean ematen zaio hasiera pausoak dituen azken prozesioari.

Erromako guardiak eskolta ematen die “Hilerriko Kristo” eta “Andra Maria Nahigabetua” pausoei hilerriraino. Han, otoitz labur baten ostean, Kristoren pausoa bere ohiko lekuan jartzen da, alegia, hilerriko kaperaren hormetako batean, eta “Andra Maria Nahigabetua” hartuta elizara itzultzen da prozesioa.

San Severino plazatik irteten da eta Pio Bermejillo eta Martin Mendia kaleetan ibili ostean, El Millonario zubia zeharkatu eta hilerrirako bidea hartzen du.